The Ballad: “Dick o’ the Cow”

 

Text Too Small?

AAA
Dick o' the Cow
Now Liddesdale has layen lang in,
  There is nae riding there at a’;
The horses are grown sae lither fat,
  They downa stur out o’ the sta’.

Fair Johnie Armstrang to Willie did say—
  “Billie, a riding we will gae;
England and us have been lang at feid,
  Ablins we’ll light on some bootie.”—

Then they are come on to Hutton Ha’;
  They rade that proper place about;
But the Laird he was the wiser man,
  For he had left nae gear without.

For he had left nae gear to steal,
  Except sax sheep upon a lee:
Quo’ Johnie—“I’d rather in England die,
  Ere thir sax sheep gae to Liddesdale wi’ me.”—

—“But how ca’ they the man we last met,
  Billie, as we cam ower the know?”—
—“That same he is an innocent fule,
  And men they call him Dick o’ the Cow.”—

—“That fule has three as good ky of his ain,
  As there are in a’ Cumberland, billie,” quo’ he:—
—“Betide me life, betide me death,
  These ky shall go to Liddesdale wi’ me.”—

Then they have come on to the poor fule’s house,
  And they hae broken his wa’s sae wide;
They have loosed out Dick o’ the Cow’s three ky,
  And ta’en three co’erlets frae his wife’s bed.

Then on the morn when the day was light,
  The shouts and cries rase loud and hie:
—“O had thy tongue, my wife,” he says,
  And o’ thy crying let me be!

“O had thy tongue, my wife,” he says,
  And o’ thy crying let me be;
And ay where thou hast lost ae cow,
  In gude suith I shall bring thee three.”—

Now Dickie’s gane to the gude Lord Scroop,
  And I wat a dreirie fule was he;
—“Now had thy tongue, my fule,” he says,
  “For I may not stand to jest wi’ thee.”—

—“Shame fa’ your jesting, my Lord!” quo’ Dickie,
  “For nae sic jesting grees wi’ me;
Liddesdale’s been in my house last night,
  And they hae awa my three ky frae me.

“But I may nae langer in Cumberland dwell,
  To be your puir fule and your leal,
Unless you gi’ me leave, my Lord,
  To gae to Liddesdale and steal.”—

—“I gi’ thee leave! my fule,” he says—
  “Thou speakest against my honour and me;
Unless thou gi’ me thy trowth and thy hand,
  Thou’lt steal frae nane but whae sta’ frae thee.”—

—“There is my trowth and my right hand,
  My head shall hang on Hairibee;
I’ll ne’er cross Carlisle sands again,
  If I steal frae a man but whae sta’ frae me.”—

Dickie’s ta’en leave o’ lord and master,
  I wat a merry fule was he!
He’s bought a bridle and a pair of new spurs,
  And pack’d them up in his breek thie.

Then Dickie’s come on to Pudding-burn house,
  E’en as fast as he might drie;
Then Dickie’s come on to Pudding-burn,
  Where there were thirty Armstrangs and three.

—“O what’s this come o’ me now?” quo’ Dickie;
  “What mickle wae is this?” quo’ he:
“For here is but ae innocent fule,
  And there are thirty Armstrangs and three!”—

Yet he has come up to the fair ha’ board,
  Sae weil he’s become his courtesie!
—“Weil may ye be, my gude Laird’s Jock!
  But the deil bless a’ your cumpanie.

“I’m come to plain o’ your man, fair Johnie Armstrang,
  And syne o’ his billie Willie,” quo’ he;
How they’ve been in my house last night,
  And they hae ta’en my three ky frae me.”—

—“Ha!” quo’ fair Johnie Armstrang, “we will him hang.”—
  —“Na,” quo’ Willie, “we’ll him slae.”—
Than up and spak another young Armstrang,
  —“We’el gie him his batts and let him gae.”—

But up and spak the gude Laird’s Jock,
  The best falla in a’ the cumpanie;
—“Sit down thy ways a little while, Dickie,
  And a piece o’ thy ain cow’s hough I’ll gie ye.”—

But Dickie’s heart it grew sae grit,
  That the ne’er a bit o’t he dought to eat—
Then was he aware of an auld peat house,
  Where a’ the night he thought for to sleep.

Then Dickie was ware of an auld peat house,
  Where a’ the night he thought for to lye—
And a’ the prayers the pure fule prayed
  Were, “I wish I had amends for my gude three ky!”—

It was then the use of Pudding-burn house,
  And the house o’ Mangerton, all haill,
Them that cam na at the first ca’,
  Gat nae mair meat till the neist meal.

The lads that hungry and weary were,
  Abune the door-head they threw the key;
Dickie he took gude notice o’ that,
  Says—“There will be a bootie for me.”—

Then Dickie has into the stable gane,
  Where there stood thirty horses and three;
He has tied them a’ wi’ St Mary’s knot,
  A’ these horses but barely three.

He has tied them a’ wi’ St Mary’s knot,
  A’ these horses but barely three;
He’s loupen on ane, ta’en another in hand,
  And away as fast as he can hie.

But on the morn, when the day grew light,
  The shouts and cries raise loud and hie—
—“Ah! whae has done this?” quo’ the gude Laird’s Jock,
  “Tell me the truth and the verity.”—

“Whae has done this deed?” quo’ the gude Laird’s Jock;
  —“See that to me ye dinna lie!”—
—“Dickie has been in the stable last night,
  And has ta’en my brother’s horse and mine frae me.”—

—“Ye wad ne’er be tald,” quo’ the gude Laird’s Jock;
  Have ye not found my tales fu’ leil?
Ye ne’er wad out o’ England bide,
  Till crooked, and blind, and a’ would steal.”—

—“But lend me thy bay,” Fair Johnie can say,
  “There’s nae horse loose in the stable save he;
And I’ll either fetch Dick o’ the Cow again,
  Or the day is come that he shall die.”—

—“To lend thee my bay!” the Laird’s Jock can say,
  “He’s baith worth gowd and gude monie;
Dick o’ the Cow has awa twa horse,
  I wish na thou may make him three.”—

He has ta’en the Laird’s jack on his back,
  A twa handed sword to hang by his thie;
He has ta’en a steil cap on his head,
  And galloped on to follow Dickie.

Dickie was na a mile frae aff the town,
  I wat a mile but barely three,
When he was o’erta’en by Fair Johnie Armstrang,
  Hand for hand, on Cannobie lee.

—“Abide, abide, thou traitour thief!
  The day is come that thou maun die.”—
Then Dickie look’t ower his left shoulder,
  Said—“Johnie, hast thou nae mae in companie?—

“There is a preacher in our chapell,
  And a’ the live lang day teaches he:
When day is gane, and night is come,
  There’s ne’er ae word I mark but three.

“The first and second is—Faith and Conscience;
  The third—Ne’er let a traitor free:
But, Johnie, what faith and conscience was thine
  When thou took awa my three ky frae me?

“And when thou had ta’en awa my three ky,
  Thou thought in thy heart thou wast not weil sped,
Till thou sent thy billie Willie ower the know,
  To take thrie coverlets off my wife’s bed!”—

Then Johnie let a speir fa’ laigh by his thie,
  Thought weil to hae slain the innocent, I trow;
But the powers above were mair than he,
  For he ran but the puir fule’s jerkin through.

Together they ran, or ever they blan;
  This was Dickie the fule and he—
Dickie could na win at him wi’ the blade o’ the sword,
  But feld him wi’ the plummet under the e’e.

Thus Dickie has feld Fair Johnie Armstrang,
  The prettiest man in the south country—
—“Gramercy!” then can Dickie say,
  “I had but twa horse, thou hast made me thrie!”—

He’s tane the steil jack aff Johnie’s back,
  The twa handed sword that hang low by his thie;
He’s ta’en the steil cap aff his head—
  —“Johnie, I’ll tell my master I met wi’ thee.”—

When Johnie wakened out o’ his dream,
  I wat a dreirie man was he:
—“And is thou gane? Now, Dickie, than
  The shame and dule is left wi’ me.

“And is thou gane? Now, Dickie, than
  The deil gae in thy companie!
For if I should live these hundred years,
  I ne’er shall fight wi’ a fule after thee.”—

Then Dickie’s come hame to the gude Lord Scroope,
  E’en as fast as he might hie—
—“Now, Dickie, I’ll neither eat nor drink,
  Till hie hanged thou shalt be.”—

—“The shame speed the liars, my Lord!” quo’ Dickie;
  “This was na the promise ye made to me!
For I’d ne’er gane to Liddesdale to steal,
  Had I not got my leave frae thee.”—

—“But what garr’d thee steal the Laird’s Jock’s horse?
  And, limmer, what garr’d ye steal him?” quo’ he;
“For lang thou mightst in Cumberland dwelt,
  Ere the Laird’s Jock had stown frae thee.”—

—“Indeed I wat ye lied, my Lord!
  And e’en sae loud as I hear ye lie!
I wan the horse frae Fair Johnie Armstrang,
  Hand to hand on Cannobie Lee.”

“There is the jack was on his back,
  This twa handed sword hang laigh by his thie,
And there’s the steil cap was on his head;
  I brought a’ these tokens to let thee see.”—

—“If that be true thou to me tells,
  (And I think thou dares na tell a lie,)
I’ll gie thee fifteen punds for the horse,
  Weil tald on thy cloak lap shall be.

“I’ll gie thee ane o’ my best milk ky,
  To maintain thy wife and children thrie;
And that may be as gude, I think,
  As ony twa o’ thine wad be.”—

—“The shame speed the liars, my Lord!” quo’ Dickie;
  “Trow ye ay to make a fule o’ me?
I’ll either hae twenty punds for the gude horse,
  Or he’s gae to Mortan fair wi’ me.”—

He’s gien him twenty punds for the gude horse,
  A’ in goud and gude monie;
He’s gien him ane o’ his best milk ky,
  To maintain his wife and children thrie.

Then Dickie’s come down thro’ Carlisle toun,
  E’en as fast as he could drie;
The first o’ men that he met wi’
  Was my Lord’s brother, Bailiff Glozenburrie.

—“Weil be ye met, my gude Ralph Scroope!”—
  —“Welcome, my brother’s fule!” quo’ he;
“Where didst thou get Fair Johnie Armstrang’s horse?”—
  —“Where did I get him? but steal him,” quo’ he.—

—“But wilt thou sell me the bonny horse?
  And, billie, wilt thou sell him to me?” quo’ he:—
—“Aye; if thoul’t tell me the monie on my cloak lap:
  For there’s never ae penny I’ll trust thee.”—

—“I’ll gie thee ten punds for the gude horse,
  Weil tald on thy cloak lap they shall be;
And I’ll gie thee ane o’ the best milk ky,
  To maintain thy wife and children three.”—

“The shame speid the liars, my Lord!” quo’ Dickie;
  “Trow ye ay to make a fule o’ me?
I’ll either hae twenty punds for the gude horse,
  Or he’s gae to Mortan fair wi’ me.”—

He’s gien him twenty punds for the gude horse,
  Baith in goud and gude monie;
He’s gien him ane o’ his best milk ky,
  To maintain his wife and children thrie.

Then Dickie lap a loup fu’ hie,
  And I wat a loud laugh laughed he—
—“I wish the neck o’ the third horse were broken,
  If ony of the twa were better than he.”—

Then Dickie’s come hame to his wife again,
  Judge ye how the poor fule had sped:
He has gien her twa score English punds,
  For the thrie auld coverlets taen aff her bed.

—“And tak thee these twa as gude ky,
  I trow as a’ thy thrie might be;
And yet here is a white footed nagie,
  I trow he’ll carry baith thee and me.

“But I may nae langer in Cumberland bide,
  The Armstrangs they would hang me hie.”—
So Dickie’s ta’en leave at lord and master,
  And at Burgh under Stanmuir there dwells he.